"Pòst na òdpùscë"… wnetk na platce!
Z redoscą dôwómë do wiédzë, że ju w lëpińcu 2018 rokù to dô do kùpieniô platkã z gôdkama jednégò z nôbëlniészich kaszëbsczich gôdôszów!
Ùgôdënk w ti sprawie pòdpiselë we wtórk, 20. gromicznika, w sedzbie Mùzeùm Kaszëbskò-Pòmòrsczi Pismieniznë i Mùzyczi w Wejrowie, direktor ti placówczi Tomôsz Fópka a ks. Róman Skwiércz.
Na platce mdą nôbëlniészé gôdczi a felietónë ks. Rómana zebróné ze slédnëch cziledzesąt lat. Nót je przëbôczëc, że na zôczątkù 90. lat XX stalata kasétë z jegò gawãdama òkôzałë sã wëdôwiznowim hitã nié le na kaszëbsczim rénkù. W ùszłim rokù ks. Róman béł wëprzédniony bez Sztudérsczi Klub "Pomorania" Medalã Stolema a latos mdze òn fejrowôł 25 lat kapłaństwa.
Promòcjô platczi mdze òb lato we Wielu, òbczas Turnieju Gôdôszów. Kòòrdinatorã projechtu je Róman Drzéżdżón.
rd